KHAWTHLIR

Thisen pe
Mamit Hmunsam Pastor Bial KṬP-te chuan July 13, 2015 khan Hmunsam Kohhran sunday school hall-ah blood donation camp an huaihawt a, Mamit District Hospital tan thisen unit 45 pein, a petute mipa 34 leh hmeichhia 11 an ni. Nimin vek khan JC Security pawhin Synod Hospital tan mipa 14 leh hmeichhe pahnihin thisen unit 16 an pe.

Power lâkna en
Lunglei Nghasih Zaua leilet neitute tana kawlphetha pawh luhna tur chu, nimin khan Lunglei High Powered Committee vice chairman S Laldingliana leh Lungleia chanchinbu mite'n a hmunah an enfiah. Power & Electricity executive engineer Zodingliana leh Nghasih Zau Farmers Association hruaitute'n an lo dawngsawng. Kawlphetha pawhna tur thawh khatnaah cheng nuai 22 leh thawh hnihnaah cheng nuai 30 ruahman a ni.

MJA Library pe
Lalrokhawma Hauheng chuan a lehkhabu ziah, 'Ka tum ka hlen ta' (historical play) chu MJA Public Library-a dah turin bu khat a pe a, a chungah MJA-in lawmthu a sawi.

Zirlai chawimawi
St.Peter’s Higher Secondary School, Chhingchhip chuan nimin khan C Lianthangpuia Award for Proficiency in HSLC 2015 an sem a, parliamentary secretary Hmingdailova Khiangte-in a hmanpui. Award hi kum 2015 HLSC examination-a St. Peter’s HSS aṭanga topper Lalthla­muani leh Chhingchhip High School-a topper Lalremtluanga hnenah hlan a ni a, lawmpuina thuziak leh Rs. 3,500 ve ve pek an ni.

NERPAP sawiho
Nimin khan Lawngtlai DEO pisaah National Electoral Roll Purification and Authentication Programme (NERPAP) kalpui mek chungchang sawiho a ni a, Lawng-tlai district observer Lalhmachhuana’n a kaihruai. Meeting-a tarlan danin, January-June, 2015 chhungin Lawng­tlai East leh Lawngtlai West constituency aṭangin mi 394 electoral roll-ah thun thar an ni.