Pisa hun vawn dik kawngah GAD-in ṭanrual a ṭul an ti

General Administration Department (GAD) chuan sorkar hnathawkte a hun taka pisa an kai theihna atan hma a la zel. GAD hian pisa thlen huna thleng leh thleng lo an enfiah ṭhin a, office hour-a office chhuahsan ṭhin an awm leh awm loh erawh an endik lo.

Vanglaini palai zawhna chhangin GAD secretary Lalrinliana Fanai chuan, sorkar hnathawkte'n a hun taka pisa an kai theihna atan theih ang anga hma an lak thu a sawi a, "GAD ringawt tan chuan tih theih loh chin a awm. Office hrang hrang kal kual a, endik vek a harsa. Chuvangin, secretary-te leh head of department-te nena ṭan tlan a ṭul a ni. Feed back kan dawn dan­in, hmalak a nih hnuah office tlai an tlem sawt a, a zawng zawng erawh chuan a harsa," a ti.

GAD hmalaknain office hrang hrangah surprise check neih ṭhin a ni a, a hun taka pisa kai lote chu an casual leave paihsak (cut) ṭhin an ni. An tlai ngun dan azirin hremna tur dagn pawh duan a ni.

Lalrinliana Fanai chuan, phalna nei loa office hun chhunga office chhuahsan phal a nih loh thu sawiin, "Eng emaw harsatna bik tak chu a awm thei. Mahse, a hun loa pisa chhuahsan a nih dawn chuan phalna lak a ngai. Phalna nei loa pisa chhuahsante chu hrem theih an ni. A hun hmaa office chhuahsan an tlem theihna atan hian Secretariat-ah chuan bus timing tihtlai a ni," a ti.

GAD Secretary chuan, a hun loa office chhuah­san ṭhin a rehna atana hmalak chu thil ṭul tak a nih thu a sawi rualin, a hun hmaa office chhuahsan ṭhinte venna atana checking neih a nih ve ngai loh thu a sawi.