Sikul ṭanpuina sum hman dan sawiho

School Education minister H Rohluna hoin, SSA aṭanga sikul enkawlna tur School Grant & Maintenance Grant pek chhuah tur nimin khan minister pisaah an thlirho.

He hunah hian Mizoram Primary Teacher Association (MPTA) leh Middle School Teacher Association (MSTA) hruaitute an tel.

H Rohluna chuan, SSA hnuaia school grant leh maintenance grant pek chhuah tur chu ṭang­kai tak leh a hmanna tur dik taka hman a nih ngei theih nan MSTA leh MPTA hruaitute chu a ṭul anga hmalakpui tur leh enpui zui turin a sáwm a, “School grant leh maintenance grant-te hi a pawisa tam tham lo mah se, ṭangkai taka hman theih a ni. Tun hmaa kan palzam mai mai ang chi kha tunah chuan a theih tawh loh,” a ti a; grant-te chu a hmanna turah hman a ni em tih enzui a nih tur thu a sawi.

Parliamentary secretary Joseph Lalhimpuia pawhin thu sawiin, “Tunlaiah media a chak tawh si a, thil thleng hrang hrangte pawh awlsam têin kan hre zung zung a, chuvang chuan neitu tak tak rilru pu chunga hna kan thawh a ṭul tak zet a ni,” a ti.

SSA aṭang hian kum tin sorkar sikul leh sorkar ṭanpui primary school-ah school grant Rs. 5,000 leh maintenance grant Rs. 7,000 pek a ni a, middle school-ah chuan school grant Rs. 7,000 leh maintenance grant Rs. 7,500 pek a ni.