Unlock 8.0 lem tidarhtua puh Police-in thubuai an siamsak

December 6, Nilaini chawhnu lama social media hrang hranga darh, 'Unlock 8.0' inkaihhruaina dan thar ni âwm tak siam a, thu belhchian dâwl lo thehdarhtua puh Jerome Malsawmtluanga (20), Venghnuai, Aizawl chu police-te'n manin thubuai an siamsak.

Thu dawn danin, Unlock 8.0 kaihhruaina chu Nilaini chawhnu lamah a darh ṭan a, koh­hran leh zirna-in bakah, zan curfew chungchang thlengin mi a tiphâwklêk a, ṭhutkhawm hman hmawh ko hmante pawh an awm nia hriat a ni.

Thu dik lo thehdarh hi CID Cyber Crime Police Station chuan Dec 6 zan khan an chhui zui nghal a, nimin chawhnu lam khan thu phuahchawpa tichhuak­tua puh Jerome Malsawmtluanga, Veng­hnuai chu an man ta a ni.