MCS lâk danah sorkar khing mah se, MCS lâk a buai kan ring lo - MPSC chairman

Mizoram Public Service Commission (MPSC)-in Mizoram Civil Service (MCS) a lak dana Mizoram sorkar khinna chu July 22, 2015 hian Gauhati High Court, Aizawl Bench-in a ngaihtuah dawn. MPSC chairman Andrew Lalherliana chuan, MCS tur lakna an kalpui mekah Court-a thu awm vangin harsatna a awm a rin loh thu a sawi.

Taxation department-a inspector C Lalṭhazuala chuan April 2015 tìr lam khan Gauhaiti High Court-ah petition a thehlut a; Mizoram sorkarin kum 2011-12 leh 2012-13 chhunga departmental promotion-a MCS-a lut turte post a hup betah a ngai.

Promotion-a MCS lut an awm loh laiin, direct recruitment hmangin MCS-ah mi eng emaw zat an luh avangin Mizoram sorkar chu High Court-ah a khing a ni.

C Lalṭhazuala thu thlen avang hian June 3, 2015 khan High Court chuan MCS exam kalpui lo turin Mizoram sorkar a hriattir a; mahse, Mizoram sorkar ngenna angin Court chuan Mizoram sorkar a hriattirna chu a sût leh a ni.

Vanglaini palai zawhna chhangin MPSC chairman Andrew Lalherliana chuan, Court thubuai avang hian MCS tur lakna an kalpui mekah harsatna an tawh a rin lo thu a sawi a, "Tun dinhmunah chuan departmental promotion-a MCS-a lut turte quota hi fill-up vek a ni tawh. Quota an neih leh hunah chuan ṭha takin an quota chu fill-up sak an ni leh mai turah ka ngai. Hriat lâwk loh thil a thleng a nih loh chuan MCS tur kan lak turah hian harsatna a awm ka ring lo," a ti.

MPSC chuan Combined Competitive Examination 2015 a buatsaih mek a, prelims exam neih tawh niin, mains examination hmachhawn thei tur thlan chhuah hna kalpui mek a ni. Kumina Combined Competitive Exam-ah hian MCS tur mi 10, MPS tur mi panga leh MIS tur mi pali lak tum a ni.