Cooperative society-te tan lCDP sum sem Society-te nuai 4494.452 ruahman a ni

Nimin khan Cooperative registrar meeting hall, Aizawlah Integrated Cooperative Development Project ( lCDP) hnuaia co-operative society-te tana ṭanpuina sum an sem. ICDP hnuaiah hian Mizorama cooperative society-te tan cheng nuai 4494.452 dah a ni.

Inkhawm hmanpuitu Cooperation minister Lalrinmawia Ralte chuan, Mizoram sorkara sum harsatna awm zel tur vanga buaina nasa zawk a thlen lohna atan sum neih ang angte awmze nei taka hman a ṭul thu a sawi a, "Hmarchhak state-te'n special category an nihna anga duhsakna an dawn ṭhinte a tawp ṭan a, sorkar mai ni lo state mipuite pawhin sum hman leh peipunna kawngah kan ṭhanharh a ngai dawn a ni," a ti.

Cooperation hnuaia society hrang hrangte chu ei leh bar bakah, sum deh chhuah kawnga nasa zawka mipui zirtir tur a ni tih sawiin Lalrinmawia Ralte chuan, "Finance department tana tih rem si lo, sum peipun leh loan rulh ṭhat theih dan tur thlenga mipui zirtir turin mawhphurhna pawimawh tak nei in ni," a ti a; loan ṭangkaina leh loan rulh ṭhat theih dan mipuite'n an hriatchiah a pawimawh thu a sawi.

ICDP hnuaia sum ruahman cheng nuai 4494.452 aṭang hian MAHFED-in Rs. 15,00,000, MCAB-in Rs 10,00,000, MIZOFED-in Rs. 80,00,000, MAHCO-in Rs. 41,00,000, PIGFED-in Rs. 15,00,000, MASCOS-in Rs. 2,00,000, WOMENFED-in Rs. 15,00,000, MSCU-in Rs. 5,00,000 leh ZOFISFED-in Rs. 8,00,000 an chang dawn a ni.

ICDP Scheme hnuaiah hian Mizorama Cooperative Societies 1400 a inziaklut member 50,000 chuangin ṭanpuina sum hi an dawng thei dawn a ni.