Champhaiah mock drill nei

Champhai District Level Mega Mock Drill chu nimin khan Champhaiah neih a ni a, National Disaster Management Authority (NDMA)-a senior consultant Shivajee Singh-a'n a telpui.

Mock Drill-ah hian lirnghing magnitude 7 vanga Champhai hmun hrang hranga chhiatna thlengah insaseng dan leh chhanchhuah hna thawh dan lem chan a ni a; mock drill zawh velah site observer-te'n report pein, hmasawn ngaihna hrang hrangte an sawiho nghal.

Shivajee Singh chuan, Champhaiah Mega Mock Drill neih vawi khatna ni mah se, chanvo hrang hrang chelhtute'n an thawk ṭha a tih thu a sawi a, "Mipuite'n inpuahchahna ṭha zawk leh nacháng an hriat theih nan zirtirna pek kawngah ṭan lak zel a pawimawh," a ti.