Lungleiah World Population Day hmang

Health department buatsaihin nimin khan Lunglei DC conference hall-ah ‘World Population Day-cum-Fortnight Awareness’ hman a ni a, Lunglei additional DC Roṭhuama'n a hmanpui.

Inkhawm hi Lunglei chief medical officer Dr VLMS Dawngliana'n a kaihruai a; R Roṭhuama chuan, "Khawvel hmasawn zelah mihring an pung chak zel a, ei leh in bakah hriselna kawngah hmasawn zel a nih angin mimal dam chhung pawh a rei tulh tulh a. Khawvela mihring mamawh boruak, tui leh ei leh in tur leh thil dang a pung si lo a, chuvang­in mihring pun dan ven a pawimawh ta a ni," a ti.

Thupui sawitu, Lung­lei SMO Dr Lalparliani chuan, family planning tih chuan fa neih tlem ngawr ngawr a kâwk lo tih sawiin, "Kan eizawnna mila fa neih leh chhungkuain a zawh tur tâwk chin fa neih chungchang sawina a ni," a ti a; nau nei zing lutukte'n nauchhiat an awl bakah, naute hrisel an nei thei lo a, chhungkua tan phurrit leh harsatna a tam phah ṭhin thu a sawi.