Term 2 aia rei a sorkar theih : R Lalzirliana

Congress party vice president R Lalzirliana chuan, eptu party-te innghahna leh ṭawngkam hman uar ber chu 'Term hnih bak a sorkar theih loh' tih a nih thu a sawi a, mahse term hnih aia rei a sorkar theih tih a sawi.

Aizawl West-III Block Congress-in nimina Khatla South YMA hall-a political session an neih a hmanpuinaah R Lalzir­liana chuan, "Tripura leh West Bengal-ahte pawh term hnih aia rei sorkarna an siam ṭhin. Chuvangin, term hnih aia rei a sorkar theih a, inthlan lo awm leh tur pawh hi hlauhawmah ka ngai lo," a ti.

R Lalzirliana chuan, sikul kai hun sawn hma chungchang sawiin, "Hnam hrisel kan nih theih nan leh ṭhalaite'n nunphung dik an zawh theih nan mut hmaa thawh hma a ṭha. Ram tan a ṭha zawk dawn tih hriain sikul ṭan hma kalpui a ni. Rah ṭha a chhuah mek zel," a ti a; sikul ṭan hma vanga inchhungkhur inpawh leh nuam ta sawt an awm tih a sawi.