Pangbalkawn P/S khâr chhan sawifiah

Pangbalkâwn V/C chuan thuchhuah siamin, Pangbalkawn V/C leh an khuaa tlawmngai pawlte inthurualin Pangbalkawn Primary School building a chhiat lutuk vanga sikul an khâr chungchangah Pangbalkawn Congress Unit-te'n thu dik lo an puangzar niin an tarlang.

Pangbalkawn V/C-te tarlan danin, May 20, 2015 zanah V/C leh NGO hrang hrang hruaitute leh Anganwadi Centre-I leh Centre-II worker ten joint meeting an nei a, chutah chuan an khaw P/S chungchang chu thuneitute hnenah thlen a, June 2015 chhunga thu lawmawm an dawn loh chuan school boycott thleng­a hmalak an rel a ni.

An thil phût chu sor­karah an thlen a, a copy pawh Kolasib SDEO leh bialtu MLA-te pawh pek an ni a; Congress V/C member C Lalnuntluanga leh Lalhruailiana ten bialtu MLA an dâwr a, chhanna an dawn chu 'Sum a awm lo' tih a ni. Chuvang chuan, zirlai nu leh pate nen sikulah inhmuhkhawm a ni a, sikul khar chu lungrual takin an pass ta niin an tarlang.

Pangbalkawn V/C-te chuan, "Pangbalkawn Congress Unit Committee invuahte'n NGO hmalakna ni lo anga an puangzar hi Pangbalkawn khawtlang zah lohna lian tak niin kan hria. Anmahni ngei pawh sikul chungchang ngaihtuahnaah an tel ve a, an thil tih hi hriatthiam har kan ti hle. Khawtlang an hmangaih a, zirna ṭha an duh a nih chuan a rang thei ang bera insawifiah turin kan phût a ni," an ti.

Pangbalkawn V/C-te chuan, July 3, 2015-a Kolasib-ah bialtu MLA PC Zoram Sangliana'n Pangbalkawn V/C-te Bru-te ration card lem siamsaka a puh chu mak an tih thu an sawi bawk a; bialtu MLA chu Pangbalkawn V/C-in Bru-te ration card lem an siamsak a hmu a nih chuan anmahni hmuhtir ve turin an phût a ni.