Covid-19 dan hnuaiah 66,237 man tawh Sakhaw thila pungkhawm man an la awm lo?

Mizoram Police tarlan danin, May 4, 2020 aṭangin Covid-19 kaihhnawih dan hnuaiah mi 66,237 man an ni tawh a, sum chawi chu Rs. 1,24,88,100 a ni. Sakhaw thila punkhawm vanga man an la awm lo nia tarlan a ni a; Sakawrdai leh Vaitin khuaah nikum khan inkhawm vanga pawisa chawitir an awm tawh thung. 

Nimina Police press statement-a a lan danin, The Mizoram (Containment and Prevention of Spread of Covid-19) Ordinance/Act, 2020 (Covid-19 Act tiin kan sawi zui ang) bawhchhia man tawh mi 66,237 zinga a tam ber, mi 62,869 chu police leh sorkar official-te man an ni a; flying squad-in an man mi 27,565 leh police dangin an man mi 35,304 an ni. Local/Village task force man mi 3,368 an awm bawk. 

Mi 66,237-te sum chawi tlingkhawm chu Rs. 1,24,88,100 a ni a; chu'ng zinga Rs. 1,20,95,200 chu police-te'n an chawitir niin, Rs. 3,92,900 erawh chu local/ village task force-te'n an chawitir a ni. 

Covid-19 Act Section 4(4)-ah chuan, sorkara thuneitute phalna la hmasa loin sakhaw thil leh vantlang/ khawtlang thila punkhawm khap a ni (Organising any social or religious event without prior permission from the competent authority). He dan bung leh cháng bawhchhia man an la awm loh thu leh pawisa chawitir pawh an la awm loh thu, Police press statement-ah tarlan a ni.

Hetih lai hian, December 25, 2020 - Krismas ní khan khaw pahnih - Sakawrdai leh Vaitin khuaa Evangelical Free Church of India (EFCI) Kohhrante chu biak-inah an inkhawm avangin police-te'n Rs. 5,000 ve ve an chawitir thung. Pawisa an chàwi tawh chu police lamin an pêk lêt leh pêk lêt loh zawhna chhángin Sakawrdai EFCI Kohhrana kohhran upa pakhat chuan, pêk lêt an nih àwm a hriat loh thu Vanglaini palai a hrilh. 

January 6, Nilaini zing dar 9 leh nimin zing dar 9 inkar bikah Covid-19 Act bawhchhia mi 338 man an ni a, an sum chawi belhkhawm chu Rs. 71,600 a ni. Mi 338 zinga 306 chu police-te man niin, mi 28 chu flying squad man an ni a, local task force-in an man mi pali an tel bawk. 

Nilaini zing dar 9 leh nimin zing dar 9 inkara man mi 338-te chu vantlang hmuna hmui/ hmai tuam lo mi 231, social/ physical distancing zâwm lo mi 60, vantlang hmuna chil chhâk mi 15 leh, state leh central sorkar dan dang bawhchhia mi 32 an ni.