Aizawl Indoor Stadium lungphùm phúm India-ah kan Sports Policy a tha berin ka hria - Deputy CM

Aizawl Indoor Stadium sakna tur lungphùm chu a sakna tur hmun Hawla Indoor Stadium tualah nimin khan phùm a ni a; lung phúmtu deputy chief minister Tawnluia chuan, Mizoram chu India rama sports policy nei ṭha ber nia a hriat thu a sawi.

Sports department-in hma an lak nasat thu sawiin Tawnluia chuan, "Sports Policy kan nei a, India ramah keini aia nei ṭha an awm loin ka hria. Industry atana sport puan a nih avangin mi tam takin eizawnna an neih theih ka beisei," a ti a; sorkarin an hmalaknaah a puih zel tur thu a sawi.

Deputy Chief Minister chuan, sorkarin sum awm si loin lungphûm a phûm ṭhin nia sawi a awm thei tih sawiin, "Nikum kum tàwp lam khan Chief Minister-in lungphùm a phúm mawlh mawlh a, a la phúm zel dawn. Phûm mawlh mawlh chuan a hlawhtling mawlh mawlh dawn tihna a ni. A lem kan phúm ve ngai lo a, a tak phùm chuan a hlawhtling ṭhin," a ti.

Sports minister Robert Romawia chuan, a depart­ment chan hnuaiah lung­phùm phùm tlut tlut a nih avangin 'Sum a awm em ni' tia sawi an awm thu a sawi a, "Sorkar kal­phungah sanction awm loin lungphùm an phúm ngai lo. Mipui bumna nge sum an nei tak tak tite an awm a, kum 2022-23 a thlen chuan, 'A takin an ti­hlawh­tling a, an hawng mup mup mai' an tih ka ring," a ti. 

Covid-19 léng avangin harsatna nasa tak an tâwk tih sawiin Robert Romawia chuan, "Mahse, kan ṭhu thluang mai lo. Ka department chana rules siam ngai kan siam hman a, DPR pawh tam tak kan siam. DPR ṭhenkhat a hlawhtling tawh a, la hlawhtling tur pawh a tam," a ti a; eptute chu sawisel ngawt loin, Mizoramin sum a hmuhna scheme-ah sum an hmu ve em tih zir chiang se a duh thu a sawi. 

Lungphûm inkhawm hi SYS secretary H Lalengmawia'n a kaihruai a, Rajya Sabha MP K Vanlalvena leh Mizoram Volleyball Association president H Lalzirliana, MLA te pawhin thu an sawi a ni.

Inkhawma tarlan danin, Aizawl Indoor Stadium sakna atan hian Khelo India scheme aṭangin cheng nuai 763.45 ruahman a ni a, sorkar laipui tum vek tur niin, Mizoram sorkarin a tum ve tur a awm lo. Tun dinhmunah administrative approval cheng nuai 450 dawn a ni tawh.

Stadium hi chhâwng hnih tur a ni a; chhâwng hnuai (ground floor)-ah parking, inthiarna leh market shed a awm dawn a, chhâwng chung zawk (first floor)-ah international standard volleyball court pakhat, gallery, official room, medical room leh inthiarnate a awm ang.