AMC inthlan February-ah neih a nih ka ring - MNF Vice President

MNF vice president Lalthlengliana chuan, Aizawl Municipal Corporation (AMC) inthlan turah MNF party-in hnehna an chan ngei tur thu leh, MNF chu Pathianin a chàwi sàn zel dawn thu a sawi a; AMC inthlan chu February 2021-ah neih theih a nih a rin thu a sawi bawk.

Nimina AMC Ward-I chhunga local council-a tling tharte chawimawina leh AMC campaign hawnna, Durtlang North-a neihah thu sawiin Lalthlengliana chuan, nikuma local council inthlanah 83% an lâk thu leh VC-ah hneh taka an tlin thu a sawi a, "Hengte hi kan ṭhat leh fel vang a ni lo. Pathianin MNF party hi a cháwi sáng a, a la cháwi sáng zel dawn a ni," a ti.

Lalthlengliana chuan, AMC inthlan chu kum dangah chuan LADC inthlan nen a rual ṭhin tih sawiin, "Covid-19 avangin party tin duh danin a rual thei ta lo a ni. AMC hi chu February thlaah inthlanna kan neih theih ka ring," a ti a; politics-ah ngaihdan vawi khat siam fuh leh fuh lohin nun kawng a hril thui avangin, awmnaah chian a ngaih thu a sawi.

MNF Vice President chuan, Congress party chu India ramah an tlachhe tawh hle nia sawiin, "President tur pawh an inhmu mumal thei tawh lo a, Rahul-a tak ngial pawh a ni duh tawh lo," a ti a; Mizorama Congress party pawh an dingchang tawh dawn lo niin a sawi. ZPM party pawh an kal zel dan tur a hriat loh niin a sawi bawk.

AMC Ward-I biala MNF candidate tur Lalrinenga Sailo pawhin thu a sawi a, "Tun ṭumah hian AMC sorkar thar turah ward aiawh nei ve ngei turin ṭan i la ang u," a ti.