In sak ṭanpuina dilnate pawm a ni
UDPA director H Lianzela kaihhruaiin nimin khan Planning & Programme Implementation department conference hall-ah Aizawl District Screening Committee on PMAY (Urban)-HFA an ṭhu a; in sak ṭanpuina pek turin mi 2,059 an pawm.
Ṭhutkhawmah hian PMAY (Urban) hnuaiah Aizawl district-a khaw pahnih - Aizawl 3rd DPR leh Darlawna 2nd DPR chungchang leh in sak ṭanpuina diltute dilna thlir a ni a; Aizawl 3rd DPR atana beneficiary 2,025 leh curtail tura tih mi 523 leh, Darlawn 2nd DPR atan beneficiary 34 an pawm a ni.
Mamitah pawh bawrhsap Dr Lalrozama hoin DC Conference Hall-ah District Screening Committee on PMAY-HFA (Urban) an ṭhukhawm a; Mamit district-a PMAY(U)-HFA hnuaia in sak ṭanpuina dilna lutte thlirho niin, Lengpuiah mi 227, Mamitah mi 529 leh Zawlnuamah mi 239 pawm a ni a, state level screening committee pawmpui turin an thawh leh ang.
Aizawla ṭhutkhawmah hian Aizawl District Committee member - Aizawl North-I, Aizawl North-II, Aizawl West-I, Aizawl West-III, Aizawl South-I bialtu MLA te, AMC Commissioner, Mizoram State Women’s Commission Chairman bakah, bank hrang hrang hotute an tel.
BLC hi in sak ṭanpuina Rs. 1,50,000 pek theihna a ni a, October 2019 chhung khan Aizawl leh Darlawnah dil theih hun hawn a ni. Dilnate chu Covid-19 SOP avangin enfiah mai theih a ni lo a, October-December, 2020 chhungin enfiah a ni.