IPR-in inhlan tharna hun hmang

Information & Public Relations (IPR) department chuan nimin khan an auditorium-ah Pathian hnena lawmthu sawina leh kum thar atana inhlanna hun an hmang a; IPR minister Lalruatkima'n a hmanpui.

Lalruatkima chuan, IPR department-a thawktute chu sorkar chhiahhlawh leh mipui rawngbawl tur an nih angin an hnathawh kawngah mipui tana harsatna aiin awlsamna siamsaktu ni tur leh, anmahni dawrtute tana biak nuam leh hawihháwm ni turin a chah.

IPR department chu sorkar thu leh hla puanzar leh thehdarh kawnga hma latu leh mipui sûkthlêk sorkar hriattira sorkar finchhuahtu a nih thu sawiin Minister chuan, "Department-in kan mawhphurhna ṭha takin kan hlen a, Covid-19 donaah a hmatáwngah awmin, mawhphurhna lian tak tak nei department dangte nen thawhona ṭha tak kan nei a ni," a ti.

IPR department chu mipuiin an hmuh leh hriat dan a danglam tih sawiin Lalruatkima chuan, "Hripui chungchangah sorkar thuchhuah an ngaihchànna leh rinna an nghah ngamzia a lang. Hei hian department hlutna a pek bakah sorkar tan zahawmna a keng tel a ni,'' a ti a; thawktute inpekna, thawhrimna leh thawhhonaah lawmthu a sawi.

IPR director Lallianpuii pawhin thu sawiin, an department hnathawhnaah tih dan leh chìn dan ṭhate chu chhawm nung zel tur te, an hriatna tizau a, sorkar thu leh hla vawnna kawnga rinawmna nei zel turin kal khawmte a chah. Sorkar chhiahhlawh tan mahni hnain a tawrh khawpa páwl leh kohhrana inhman a rem lo tih a sawi bawk.