Rêl kawng hi sum leh paiah hma kan sawnpui ang - CM

Chief minister Lalduhoma chuan, Sairang - Bairabi inkar rêl kawng hawn tâk chu sum leh paiah Mizoram leh mipuiin hma an sawnpui tur a nih thu a sawi.

September 13, Inrinnia rêl kawng hawn puala Lammuala inkhawmah Lalduhoma chuan, "Vawiin hi Mizoram tana ni chhinchhiah tlak leh hriat reng tawh tur a ni. Prime minister Pu Narendra Modi-a'n a hmun ngeia kala min rawn hawnsak hian Mizoram leh hmarchhak bial tana a inpekzia a tilang a ni," a ti.

Chief Minister chuan, rêl kawng thar leh rel tlan tharte chuan India ram laili nen inpawhna thûk zawk a siam dawn tih sawiin, "Sum leh paiah hma kan sawnpui hle ang," a ti a; Sairang-Bairabi rêl kawng chuan India ramah huapzo takin hmasawnna hna kalpui a nihzia a tihlan thu a sawi.

PM-in zirna-in pahnih a hawn leh a lung a phûmte chu Mizoram mamawh em em, kawng tam taka ṭangkaipui turte a nih thu sawiin CM Lalduhoma chuan, "Mizoram hmasawnna tur thil kan sawi apiang hi Prime Minister hian inhawng takin min ngaihthlaksak ṭhin a, a chungah hian kan lawm ṭhin hle a ni," a ti.