KHAWTHLIR

KṬP-in thisen pe

September 13, Inrinni khan KṬP, Bungkawn Bial chuan ZMCH tan thisen unit 82 an pe a, petute mipa 58 leh hmeichhia 24 an ni a; KṬP, Leitan South Branch pawhin Synod Hospital tan unit 36 an pe a, petute mipa 29 leh hmeichhia pasarih an ni.

CADS ruihhlo man

Central YMA hnuaia ruihhlo dotu Central Anti Drug Squad chuan September 6-12, 2025 chhung kha heroin (no. 4) hawng 4 leh Tictac bûr 81 an man a; Pregabalin mûm 42 an man bawk. Ruihhlo kaihhnawihah hian mi 36 an man a, chu'ng zinga mi pakhat chu Excise & Narcotics department hnenah an hlan a ni.

MLA-in nau piang lawmpuina a sem

Aizawl East-II bialtu MLA B Lalchhanzova, minister of state chuan September 12, Zirtawpni khan a bial chhunga nau piangte lawmpuina thilpek a sem. B Lalchhanzova hian MLA a nih hnuah Mizote'n pian pun kan mamawha a hriat avangin a bial chhunga nau piang lawmna thilpek a sem ṭhin a, kum khatah ṭum hnih semin, lawmpuina atan Rs 1,000 leh thuziak a hlan ṭhin a ni.

Ruihhlo tiral

Electric Veng VDP chuan September 13, Inrinni khan zu leh ruihhlo tam tham lo, Mizoram Police leh Excise & Narcotics department emaw tana buaipui tham loh, a zuarte’n an dahna nia an sawi aṭanga an lak khawmte an tiral. Ruihhlo an tihralte hi rakzu litre 98, heroin gram 121, alprazolam mûm 120, pregabalin mûm 33 leh tramadol mûm 200 a ni.

Kawng khar dawn

PWD Project Division-I chuan Bungkawn Vengthar aṭanga Mizoram New Capital Complex (MINECO)-a District Local Administration Officer office inkar kawng siamṭhat hna an thawh mek avangin helai kawng hi October 12, 2025 thleng khar a nih dawn thu Traffic SP Ruatsanga Ralte chuan a tarlang.