Tun kar chhungin bungraw phur rêl Sairangah a rawn tlan hman dawn - Railways Minister

Union Railways minister Ashwini Vaishnaw chuan September 13, Inrinni khan Bairabi-Sairang rel kawng hawn puala Lammuala hun hmanaah thu sawiin, tun kar chhungin bungraw phur rêl (cargo train) Sairangah a rawn tlan hman tur thu a sawi.

Ashwini Vaishnaw chuan, Sairang - Bairabi rel kawng siam chu Railways tan chona nasa tak a nih thu a sawi a, "Tlang ram a nih avangin leiverh 45 leh major bridge 55 siam a ni. Lei pakhat phei chu Qutub Minar ai pawhin a sang. Hemi a hlawhtlin theihna chhan hi Prime Minister hmalakna chak tak vang a ni," a ti.

Tun kar chhungin Sairangah cargo train a tlan tur thu sawiin Railways Minister chuan, "Thil phurh man a tlawmin a rawn thleng hma tawh dawn. Refrigerated cargo pawh a rawn thleng dawn, in thlai tharte in thawn chhuah theihna tur atan," a ti a, Mizoram tan thlai leh thei hralhna kawng a inhawn dawn thu a sawi.

Railway minister Ashwini chuan, rel kawng avangin Mizoramah khualzin an pun tur thu sawiin, "Homestay a lar chho ang a, hna thawh tur a pung dawn. Prime Minister kaihhruaiin hmarchhak bial tana a hmathlir (Act East) a tihhlawhtlinna a ni. Railway map-ah Mizoram a chuang ve ta a, Mizo mipuite ka lawmpui tak zet che u a ni," a ti.