Sairang aṭangin rêl a tlan ṭan nghal

Bairabi-Sairang rêl kawng hawn a nih hnuah Sairang leh Guwahati inkara rel tlan tur chu a tlan ṭan nghal a, Sairang-Kolkata chu naktuk September 16-ah a tlân ṭan ang a, Sairang-Delhi chu September 19, 2025-ah a tlan ṭan dawn.

Northeast Frontier Railway tarlan danin, Sairang to Guwahati (Mizoram Express) chu ni tin a tlan dawn a, Sairang aṭang leh Guwahati aṭangin zan dar 7-ah ve ve a chhuak ṭhin dawn. Chuan man (fare) chu Sleeper Class-ah Rs 300, 3-tier AC-ah Rs 800 leh 2-tier AC-ah Rs 1,130 a ni ang.

Aizawl to Delhi Rajdhani Express chu chawlhkar khatah vawi khat a tlân ṭhin dawn a, Sairang aṭangin Zirtawpni-ah tlai dar 4:30-ah chhuakin, Delhi aṭangin Thawhlehni-ah zan dar 7:50-ah a chhuak ṭhin ang, September 19, 2025 khian Sairang aṭangin a chhuak ṭan dawn a, Delhi aṭangin September 21, 2025-ah a chhuak ṭan dawn.

Rajdhani Express hi pindan zawng zawng air conditioned (AC) vek a ni a; Delhi leh Aizawl inkara rêl chuan man chu - 3-tier-ah Rs 3,625, 2-tier-ah Rs 4,890 leh 1-tier-ah Rs 7,890 a ni. Sairang-Guwahati inkar bikah 3-tier-ah Rs 1,225, 2-tier-ah Rs 1,590 leh 1-tier-ah Rs 2,590 a ni thung.

Sairang to Kolkata (Kolkata - Mizoram Express) chu chawlhkar khatah ni thum a tlan ṭhin dawn a; Sairang aṭangin Thawhṭanni, Ningani leh Zirtawpni-ah a chhuak ṭhin ang a, Kolkata aṭangin Thawhlehni, Nilaini leh Inrinni-ah a chhuak ṭhin ang.

Rêl chuan man tarlante hi rêl kawng hawn nía Sairang Station ticket counter-a tarlan ang a ni.