Lalneihsangi (Buangi) kum 108 Mizo zinga upa berah puang

Social Welfare minister Lalrinpuii chuan, Social Welfare department zirchianna aṭangin kum 108-a upa Lalneihsangi (Buangi), Khatla chu Mizo dam lai zinga upa berah September 13, Inrinni khan Aijal Club-ah a puang.

Lalrinpuii chuan, Social Welfare department chu sorkar department-ah chuan kum upate enkawltu department a nih thu a sawi a, "Tar leh upate pension kan pek ṭhin mai bakah, kum tin Upate Ni kan hmang ṭhin. Upate tana home leh day care centre siam belh a nih theih nan sorkar laipuiah thlen a ni," a ti.

Khawvel changkang zelah Mizoramah kum upa an lo pun zel thu sawiin Minister chuan, "Social Welfare department-in a chhût dan chuan, Mizoramah kum upa 70,000 chuang an awm a, kum 2036-ah chuan 1,00,000 an tlin ve tawh rin a ni," a ti a; Mizo hnam nunphungah kum upate chu thurochhiah pawimawh tak an nih thu a sawi bawk.

Lalneihsangi hi April 14, 2025-ah Venghnuaiah a piang a, a pa Thangchhunga chu Mizoramah Salvation Army corps sergeant major hmasa ber a ni. Buangi hi Behala Girls Home, Kolkata-a hmeichhia rahbi tleu leh fahrahte enkawlna hmunah a thawk ṭhin a, Mizo zinga rehabilitation centre-a thawk hmasate zinga mi a ni.