Bamboo Mission hnuaia sum pek chhuah aiin A dawngtute dawn zat nuai 78.99-in a tlem
National Bamboo Mission (NBM) hnuaiah Mizorama State Mission Director (SMD)-in Mizorama Forest Development Agency (FDA) 14 hnenah kum 2009 aṭanga 2014 chhungin cheng nuai 5804.97 pe chhuak angin a insawi. FDA 14-te erawh chuan nuai 5725.98 chiah an dawng a; sum pek leh dawn inthlauhna chu nuai 78.99 a ni.
Comptroller and Auditor General of India (CAG) Report 2014-in a tarlan danin, CAG-a auditor-te'n kum 2014-ah Environment & Forest department-in NBM a kalpui dan leh sum hman dante an chhui a; thil fel tawk lo chi hrang hrang an hmuchhuak.
CAG Report tarlan danin, NBM-a Mizoram SMD-in sum a pek chhuah zat anga tarlan leh FDA-te'n an dawn zat inmil a awm lo a; ṭhenkhatah SMD sum pek chhuah ang zat FDA-te'n an dawn loh laiin, sum pek chhuah zat aia tawm dawngte pawh an awm.
Sum pek chhuah leh dawn zat inah loh chhan CAG auditor-te'n an zawhna, SMD-in December 2014-a a chhannaah chuan, sum inpek danah bank lamah thil kal dik lo a awm vang a nih thu leh, chungte chu chinfel a nih tawh thu a hrilh. An chinfel dan erawh chu CAG chuan February 2015 thlengin a la dawng lo thung.
Sum pek leh dawn inmil lo
(Rupees in lakh)
Kum FDA hmuh SMD pek
2009-10 769.16 645.92
2010-11 1045.94 1236.82
2011-12 1354.13 1226.30
2012-13 1054.49 1313.51
2013-14 1502.26 1392.42
Total 5725.98 5804.97
CAG Report chuan, Mizoram SMD-in NBM Operational Guidelines kalhin kum 2011-14 chhungin sum a pawtpéng a, dan loin cheng nuai 36.91 a hmang niin a tarlang bawk. Cheng nuai 36.91 hmanna anga SMD-in a tarlante chu - motor bike, car, inverter, computer, theihai chî leinate leh India ram pawna study-cum-exposure-a kalna leh India Forest Sports Meet-a telna senso tihte a ni.
December 2014-a SMD insawifiahnaah chuan, cheng nuai 36.91 hmannate chu phalsak an nih thu a tarlang a; mahse chu chu pawm theih a nih loh thu leh NBM inkaihhruaina kalh a nih thu CAG report chuan a tarlang thung.
CAG Report chuan, Mizorama Bamboo Mission-in NBM General Financial Rules (GFR) 2005 zâwm loin kum 2009-2014 chhungin bungrua leh hmanrua tam tak lei a nih thu a tarlang bawk a; dan ang ni loa bungrua an leinaa sum an sen chu cheng nuai 584.47 a ni.
GFR ang chuan, Rs. 15,001-1,00,000 inkar man lei dawnin Local Purchase Committee pawmpuina a ngai a; Rs. 1,00,000 - 25,00,000 man lei turin Limited Tender Enquiry tih a ngai a, Rs. 25,00,000 chung lam man lei turin advertised tender chhuah a ngai bawk.
Hetih lai hian, Local Purchase Committee thu loin cheng nuai khat man tling lo man bungrua ṭum 18 lei niin, chutah chuan Rs. 8,30,000 hman a ni a; limited tender enquiry ti loin cheng nuai 1-25 inkar man bungrua ṭum 44 an lei a, chutah chuan cheng nuai 289.52 an séng. Advertised tender enquiry ti loin cheng nuai 30 chung lam man bungrua ṭum ruk an lei a, chutah chuan cheng nuai 286.65 an hmang a ni.