Laldenga an buaipui danah Zoramthanga'n Hawla a fak

Nimin, July 13 MNF founder president leh chief minister hlui Laldenga Treasury Square-a phum a nih champha a ni a, hemi pual hian MNF chuan Mizo Hnam Runah inkhawm an buatsaih a, MNF president Zoramthanga chuan Laldenga an buaipui danah khatih hun laia chief minister Lal Thanhawla fakawm a tih thu a sawi.

Zoramthanga chuan Laldenga chu Aizawl Treasury Square-ah khatih hun laia sorkar Lal Thanhawla kaihhruai chuan a phalsak tih sawiin, "Chief minister Lal Thanhawla’n Laldenga enkawlna senso zawng zawng Mizoram sorkarin tumsak a tiamte kha a patlin thlak hle. An chungah lawmthu kan sawi mawlh mawlh a ni," a ti.

Zoramthanga sawi danin, Laldenga hian March, 1990 khan Punjab remna siampui turin prime minister VP Singh sawmna angin Delhi a pan a ni. Delhi-ah hian chuap cancer a ni tih hmuhchhuah a ni a, VP Singh-a'n a duh ber damdawi-in pan tura a tih angin New York-a Sloans Kettering Memorial Hospital-ah treatment a la nghal a ni.

New York aṭanga an rawn haw kawngah London-a Ashford Hospital-a luhpui a nih aṭanga darkar khat hnuah ni 7.7.1990 tlai dar 2:30 khan Laldenga hi a thi a ni.