Mizoramah lirthei 1,55,128 chhinchhiah tawh

Transport department-in June 2, 2015 thlenga Mizorama lirthei an chhinchhiah tawh zat chu 1,55,128 a ni a, chung zinga 1,08,596 (70%) chu Aizawl district-a mi a ni.

Transport department aṭanga thu dawn danin, kumin June 2 thleng khan Aizawl district-ah lirthei 1,08,596 a awm a; Lunglei district-ah 14,097, Saiha district-ah 3,997, Champhai district-ah 8,121, Kolasib district-ah 9202, Serchhip district-ah 5,345, Lawngtlai district-ah 3,064 leh Mamit district-ah 2,706 a awm.

Aizawl district bikah chuan, chawhrualin ni tin lirthei thar 40 vel ziak lut (register) ang an ni a, lirthei register zinga 80% vel chu two wheeler a ni. Tunah hian 'L' series an register mek a, L bikah 6,000 a chuang tawh tih an sawi.

Kum 2014-15 chhung khan Aizawl district bikah mimal lirthei 6,932 leh sorkar lirthei 128 ziah luh thar a ni a, private motor register thar zinga a tam ber (4,703) chu two wheeler a ni. A dangte chu - car 688; Jeep, Tata, Armada, Bolero, etc. 435; truck & lorry 86; maxicab 44, excavator 39, motor-cab 32, stage carriage 11, auto-rickshaw (passenger) 10 leh Gypsy pahnih a ni.

Hetih lai hian, Transport department chuan DTO pariata kum 2014-15 chhung khan chhiah (tax & fee) an khawn aṭangin sorkar sum báwmah Rs. 16,14,17,013 an chhung lut. Hemi chhung vek hian State Transport Authority chuan Aizawl district-ah agency licence 131 a pe chhuak a ni.