Mizoram atangin UPSC exam-ah tling an awm lo UPSC-a tlingte puihna a ngaiin kalpui dawn

Union Public Service Commission (UPSC)-in Civil Services Examination (CSE) 2014 result, July 4, 2015-a a tihchhuah takah Mizo tling an awm lo a; hmarchhak state dang zawng aṭangin tling an awm thung. Hetih lai hian, Mizoram sorkarin Central Civil Service exam-a tlingte ṭan­puina a pek ṭhin chu tih­punna tumna a awm rih lo.

Vanglaini thu dawn danin, UPSC CSE 2014-ah hian interview-ah Mizo pakhat a inlan a, mahse a tling zo lo.

Hmarchhak state dang aṭang erawh chuan tling an awm deuh vek a; Assam aṭangin mi 13, Manipur aṭangin mi panga, Nagaland aṭangin mi pali, Arunachal Pradesh, Meghalaya leh Tripura aṭangin mi pakhat ṭheuh an tling nia thu dawn a ni.

UPSC-in CSE preliminary exam-a tlingte hnenah an inbuatsaih zelna atan Mizoram sorkar chuan ṭanpuina pawisa (incentive) a pe ṭhin. Chumi atan chuan March 7, 2000-ah Mizoram sorkara Education & Human Resource Development chuan hriattirna a chhuah a; ṭanpuina chu Higher & Technical Education dept. pek tur a ni.

Notification-a a lan danin, UPSC CSE prelims exam-a tlingte chu an inbuatsaih zelna atan leh coaching an kalna senso atan Rs. 20,000 thleng a pe thei a, coaching fee chu Rs. 20,000 aia a hniam chuan fee zat chiah chiah pek tur a ni. Hei bakah hian hostel/mess fee atan thla li chhung, thla tin Rs. 1,500 a pe thei bawk.

Notification-a a lan danin, UPSC exam-a tlingte hnena incentive cash award pek chhan chu Mizo ṭhalaite cho phûr nana tih a ni.