UPSC-a tlingte tanpuina tihpun tum rih lo
September 30, 2004-ah notification chhuah leh a ni a, UPSC CSE prelims exam-a tlingte hnena Incentive cash Award pek dan tihdanglam a ni. CSE-ah chauh ni loin, UPSC-in exam a buatsaih dangte pawh a huam tawh thung.
Incentive cash Award dil theihnate chu - Combined Defence Services Examination, NDA/NA Examination, Combined medical Services Examination, Engineering Service Examination, Central Police Forces Examination, Indian Economic/Indian Statistical Service Examination, Geologist Examination, IFS Examination, Special Class railways Apprentices Examination, Selection Officers/Stenographers (Grade-B/Grade-I) Examination te a ni.
A chunga tarlan service 11 atana UPSC-in prelims/written examination a buatsaiha tlingte chu Incentice Cash Ward Rs. 10,000 pek theih an ni a; an tlin nghal mai loh pawhin kum (chance) thum pek theih an ni. Ṭanpuina chu HTE department-in an normal budget aṭanga an pek tura tih a ni a, tunah erawh chuan HTE aṭangin Mizoram Scholarship Board (MSB) a indan tawh avangin MSB-in an pe tawh thung.
Hetih lai hian, UPSC exam-a tlingte hnena incentive cash award pek hi Mizoram sorkarin tihpun tumna a nei rih lo. Higher & Technical Education minister R Romawia chuan Vanglaini palai zawhna chhangin, incentive cash award chu tihpun tawh a ṭhat rualin, sum harsatna avangin tihpun theih a nih loh thu a sawi a; policy ang zawng pawhin sorkarin ruahmanna a la neih loh thu a sawi bawk.
Mizoram sorkarin UPSC exam-a tlingte ṭanpuina a pek bakah hian, sorkar laipuia Ministry of Tribal Affairs chuan UPSC, Staff Selection Commission (SSC) leh state public service commission-in civil service group A leh B atana exam a buatsaiha tlingte hnenah Rs. 50,000 an pe thei bawk a; Kristian, Muslim, Sikh, Buddhist leh Zoroastrian-te tan dil theih a ni.