Aizawla rope-way siam dan tur sawiho

UD&PA minister Zodintluanga hoin nimin khan a pisaah Aizawl khawpui leh a chhehvela rope-way hmanga inkalpawhna siam dan tur, Urban Mass Transit company leh sorkar official-te'n an sawiho.

Zodintluanga chuan, khaw­pui ṭhang mekah cable car project chu thil pawimawh tak a ni tih a sawi a, "Mipui pung zelah lirthei kalphung leh a dahna tur hmunte leh rope-way hmanga veivahna turte hi tun hmain ruahmanna a lo awm tawh a, mahse rokhawlhna eng emaw vangin chhunzawm a ni lo," a ti.

Rope-way hmanga inkal­pawhna siam chu thil ṭha tak leh ṭangkai tak tur a nih thu sawiin Zodintluanga chuan, "He project kalpui tur hian state sorkarin a remtihpui phawt a ngaih bakah, Central sorkarin a pawmpui a, sum leh pai an ngaihtuahpui a ṭul a ni," a ti a; a ṭhatna vanga duh ringawt theih a nih rih loh thu a sawi.

UD&PA secretary Dr C Vanlalramsanga chuan, rope-way hmanga inkalpawhna siam a nih theihna turin theihtawpa bawhzui tum a nih thu a sawi a, "Hlawhtlinpui ngei turin bawhzui a, mumal zawka ruahmana siam a la ṭul dawn avangin hun engemaw chen a la duh dawn a ni," a ti. Urban Mass Transit aiawhte'n hna an thawh ṭhin dan a lem nen an sawifiah bawk.

Cable car project hi a taka kalpui theih a nih chuan, Chal­tlang aṭanga Kulikawn pan theihna tur leh Leitan aṭanga Sairang leh Lengpui Airport kal theihna tur siam tum a ni.