Kohhran hmeichhiate HIV/AIDS zirtir

Mizoram State AIDS Control Society (MSACS) leh World Vision-te chuan, nimin aṭang khan Synod Conference Centre-ah Presbyterian Kohhran Hmeichhiate pualin HIV/AIDS leh a kaihhnawih thil pawimawhte zirhona hun an buatsaih.

Training of Trainers cum Advocacy Programme hi Mizoram pum huap a ni a, ni nga chhung awh tur a ni. Nimina a ṭannaah hian MSACS project director Dr Lal­malsawmi Sailo-in inlawmna thu a sawi a, Rev. Rosiamliana To­chhawng-in chhungkua leh fanau enkawl dan te, HIV/AIDS lama rawngbawl tura chona chung­changte a sawi. NACO-a SPO Alan Lalmuanpuia'n HIV/AIDS chungchang a sawifiah bawk.

MSACS Project Director chuan, Mizoram chu India rama HIV hluar­na ber pahnihna a nih thu sawiin, "He natna hi Mizoram natna a ni tih kan pawm tak tak a hun tawh a, a darh tur ven leh a kai tawhte chhawmdawl hnate hi kohhranin a kalpui a ngai tawh a ni," a ti. Kohhrante'n an huang chhungah HIV/AIDS lama hma latu tur bik committee nghet neiin, HIV/AIDS chu nasa zawkin do thei se a duh thu a sawi.

MSACS hotute aṭanga thu dawn danin, training-ah hian pastor bial hrang hrang aiawhte an tel a; chung mite chuan an bial chhunga kohhran hmeichhiate an zirtir ang a, kohhran mal tinah kohhran hmeichhe member-te an inzirtir chhawng zel dawn a ni.