NLUP sum Rs. 6,74,29,722-in a pung MLA-in pawisa dah pun dan sawifiah phut

Kum 2010-11 aṭanga 2014-15 chhungin NLUP sum bank-a dahte chu Rs. 6,74,29,722-in a pung tawh. MNF MLA Lalrinawma chuan, NLUP sum chu eng financial rules hmangin nge dah pun a nih sorkarin sawifiah se a duh thu a sawi.

Lalrinawma hian nimin khan Mizo Hnam Runah thu sawiin, Government of India Account Payment and Receipt Rules 6-in mahni pawisa khawn chhuahte hmang nghal thei department 20 a tarlan zingah NLUP line department pakuate an tel lo tih a sawi a, "Approved Annual Plan 2013-2014 Govt. of Mizoramah chuan line department-te'n sorkar aṭanga an sum hmuh tarlan zingah NLUP sumte chu an telh vek a ni," a ti.

NLUP Implementing Board hnen aṭanga line department-te'n sum an dawn, bank-a an dah punte NIB-a an thehlut leh ṭhin chu eng ‘financial rules’ hmanga ti nge an nih, mipuiah hrilhfiah thei se a duh thu a sawi a ni.

Assembly session neih zawh takah khan Agriculture minister R Lalzirliana chuan, kum 2010-11 aṭanga 2014-15 chhungin NLUP pawisa bank-a dah aṭangin a pung Rs. 6,74,29,722 a awm tawh tih a tarlang a, "NLUP pawisa dah punte hi NLUP Chief Ministers Special Scheme atan hman a ni," a ti.