Fire department.-in Rs. 27,45,000 a séng thlawn

Fire and Emergency Services tihchangtlunna tur, 'Strengthening of Fire and Emergency Services' hnuaiah cheng nuai 17.02 pawhpên a ni. Bungrua supply-tute dâwt sawi vangin ṭul loah cheng nuai 27 sên thlawn a ni bawk.

Comptroller and Auditor General of India (CAG) Report 2014-in a tarlan danin, Fire and Emergency Services tihchang­tlunna atan Ministry of Home Affairs chuan Centrally Sponsored Scheme (CSS) hnuaiah November 23, 2009-ah Mizoram sorkarah cheng vbc. 3.60 a pe a, chuta Mizoram sorkarin 10% a tum ve tur chu nuai 33 a ni.

Sorkar laipui chuan January 2010 leh May 2011 inkarah Mizoram sorkar hnenah cheng vbc. 3.27 a pe leh a; mahse Mizoram sorkarin a tum ve tur a pek loh avangin, Strengthening of Fire and Emergency Services-in a tum ber - fire station sak ṭhat, siam ṭhat leh training-na tur hmun siamte chu tihhlawhtlin a ni lo. Project-a tel lo thil dang lei nan Rs. 17,02,000 hman a ni bawk.

CAG Report-a a lan danin, Strengthening of Fire and Emergency Services project atana hman tur sorkar laipuiin a rawn pek cheng nuai 327 aṭang hian nuai 303.31 chu department bungrua leh hmanrua leina atan hman a ni a; supplier paruk aṭanga lei a ni.

Supplier parukte'n bungrua an supply-naah Central Sales Tax Rs. 5,41,000 an chawi tur a nih laiin, Rs. 32,86,000 chawi angin Fire and Emergency department-ah an inhriattir a; hei vang hian department chuan ṭul loah Rs. 27,45,000 a séng thlawn ta a ni.