Hulhliap Skill Training-a chhuakte thlah

Hulhliap Short Stay Centre aṭanga chhuakte tana kut themthiamna lam zirna (skill training)-a electrician leh aluminium fabrication zir zote chu nimin khan thlah an ni a, adviser to CM (Handholding) Dr KC Lalmalsawmzauva'n completion certificate a hlan.

Skill training zote thlahna inkhawm hi Hulhliap Core Committee chairman Malsawmzuala Ralte, Mizoram Youth Commission chairman ni bawkin a kaihruai a; skill training kalpuitu Mission Foundation Movement executive director Lalramchuanzela'n training neih dan tlangpui a sawi.

Hulhliap Skill Training-ah thil chi thum - assistant electrician, aluminium fabrication leh food processing (eiin tur siam) zir theih a ni a, September 6, 2025 khan MFM Skill Centre, Dawrpui Vengtharah ṭan a ni.

Aluminium fabrica­tion training-ah mi 28 an lut a, a tawp thlengin mi 17-in an zir. Assistant electrician zir turin mi 34 an lut a, a tawp thlenga zir chu mi 28 an ni. Assistant electrician leh aluminium fabrication zir zo mi 45 hnenah nimin khan certificate hlan a ni a; food processing zir zo mi 11 hnenah certificate hlan a lo ni tawh bawk. Certificate hi Labour, Employment, Skill Development and Entrepreneurship derpartment-in a pek a ni.

Dr KC Lalmalsawm-zauva chuan, Mizo mipate an hrisela an chak a ngaih thu sawiin, "Chumiin a ken tel chu mahni inthunun theih a ni a, mahni hma su kaw thei kan nih a ngai a, mahni inhmangaih dan dika kan inhmangaih a ngai," a ti a; mahni tana chhe tur chu ti lo turin training chhuakte a chah.

Hulhliap SSC aṭanga chhuak Skill Training zote chu sorkarin puih a inhuam thu sawiin Adviser to CM chuan, "Hna thawk duh tak tak tan chuan Handholding Policy hnuaiah kawng dap zel theih a ni. Nangmahni lamin in tih tur in tih ve a ngai a, in kal zelna turah in chhel a ngai," a ti.