Bána Kaih (Handholding) phase-II Sept. 19, 2025-ah kalpui ṭan dawn

Mizoram sorkar flagship programme Bána Kaih (Handholding) Scheme phase-II chu September 19, 2025 aṭangin kalpui a ni dawn a; Chief Ministers' Special Package dilna chu online hmanga kalpui tum a ni.

Mizoram State Policy Coordination Committee (MSPCC) chuan nimin khan Planning committee room-ah Bána Kaih phase-II kalpui dan tur an rêl a, chairman Dr KC Lalmalsawmzauva'n kaihruaiin, Planning secretary Lalmalsawma Pachuau-in Bána Kaih phase-II kalpuina atana inkaihhruaina tihdanglam ṭhenkhat a sawifiah.

Ṭhutkhawmah hian Bána Kaih phase I & II-a loan emaw, CM Special Package emaw dawng tawhte leh dawng turte hmalakna vil tur monitoring team leh progress partner ni tura dilna thehlutte zir chiang tur search team mawhphurhna sawiho a ni.

Bána Kaih phase-II chu September 19, 2025 aṭanga kalpui tura ruahman a nih thu tarlan a ni a, dilna thehluhna tur online portal hman dan enchhin a ni. CM Special Package dilna pawh online-a kalpui tum a nih avangin dilna thehlut thiam lote tan Block Development Office (BDO), Sub-Divisional Office (SDO), Deputy Commissioner (DC) office leh Common Service Centre (CSC)-te hman ṭangkai tur a nih thu an sawi.

Bana Kaih phase II-ah hian implementing department 18 an awm a, Mizoram Khadi & Village Industries Board, Information and Communication Technology department leh Mizoram Startup Mission te telh thar an ni. IPR department buatsaih ‘Bana Kaih Scheme Phase II’ sawihfiahna video enho a ni bawk.