KHAWTHLIR

Governor kâwm

Mizoram chief information commissioner John Neihlaia leh information commissioner Mangjangam Touthang te chuan nimin khan Raj Bhavan-ah Governor Gen. Dr Vijay Kumar Singh an hmu a, Mizoram Information Commission dinhmun leh hmalaknate an sawipui. Larsap chuan, RTI Act, 2005 zir chiang a, dik taka hmang thei tura ṭan la turin sorkar thuneitute a duh thu leh, mipuiin ṭangkai takin RTI Act hmang zel se a duh thu a sawi.

TB inhrilhfiah

State TB Cell chuan nimin khan Mizoram Synod Office-a thawktute pualin ngawr (TB) natna chungchang inzirtirna an buatsaih. Zirhona hi Synod moderator Rev. RC Lalnghakliana'n a kaihruai a, state TB officer Dr Zochhuanawmi'n thil pawimawh te, TB chungchang inzirtirna leh kohhran hruaitute'n hma an lakpui theihna turte a sawifiah.

Book Nest Initiative

Lunglei district bawrhsap Navneet Mann kaihhruaiin nimin khan Lungsen Aspirational Block chhunga zirlaite tana Lunglei khawpuia lehkhabu khawn khawm rûnpui 'Book Nest Initiative' kalpui mek dan thlirho a ni. Lehkhabu khawn khawmte chu sem theiha peih a nih hnuah Lungsen Aspirational Block chhunga sorkar sikul 60 thlante hnenah sem a ni ang.

College week khâr

Zirtiri Residential Science College chuan nimin khan Vanapa Hall-ah College Week 2025 khârna hun an hmang. College vice principal Dr R Lalengmawia chuan, ruih theih thil leh mipat hmeichhiat hman khawloh kawngah inveng fimkhur turin zirlaite a chah a, Annual Magazine (Senhri) a tlangzarh. College Week puala intihsiakna lawmman sem a ni a, kum 2025-26 college miss atan Lalrinhlui, 5th semester (Home Science) leh mister atan C Lalramdinpuia, 3rd semester (Computer Science) te thlan an ni.