Aizawl west bypass road laih mek titawp lailâwk turin DFO an ngen

Tlâk lama Aizawl khawpui hêlna tur kawngpui (Aizawl west bypass road) laih mekah dan loa leivung paih a nih avang leh Aizawl mipui châwmtu Tlawng lui a tihnut nasat avangin Centre for Environment & Social Justice (CESJ) chuan kawng laih titawp lailâwk turin Divisional Forest Officer (DFO), Aizawl an ngen.

Aizawl west by-pass road lai mek chungchangah CESJ hian August 28, 2025 khan Aizawl District Magistrate hnenah 'stay order' tichhuak tura ngenna an lo thehlut tawh a; mahse, District Magistrate thuneihna a ni loa sawi a nih avang leh, lui ecosystem tichhiate chunga action la thei leh hmalak mek titawp theitu chu DFO a nih avangin nimin khan DFO hnenah stay order pe tura ngenna an thehlut leh a ni.

CESJ chuan, tui chu mihringte leh thil nung tinrêng nunna hnâr a nih thu sawiin, "Tui tel loin ni khat pawh kan awm thei lo. Kawngpui sial pawh mipui tana ṭangkai leh pawimawh a ni a, nimahsela, a tel loin kan la nung thei zawk. Kawngpui sial a nih pawhin, kan nunna hnâr, kan tui tawmbûk, lui tê (perennial river) leh luipui (major river) tichhe lo thei ang berin, environment dan leh hrai zâwm tura mawhphurtute phût a ni," an ti.

Aizawl west bypass road laitute'n leivûngte Tlawng lui leh a fintu luitea an nawr liam zel chu Tlawng luiin a châwm Aizawl mipui mi nuai 4 vel zahlohna a nih thu CESJ chuan an tarlang bawk.