CYLA-in ram dang mi chhinchhiah nan sorkarin check point siam se an duh

Lawngtlai bawrhsap Donny Lalruatsanga leh Central Young Lai Association hruaitute chu nimin khan DC pisaah an inkâwm. CYLA hruaitute chuan, ram dang mi, raltlan ni lo rawn lutte chhinchhiahna turin sorkarin check point siam se an duh thu an hrilh.

CYLA hruaitute chuan, Lawngtlai khawpui huam chhungah raltlan awm khawmna camp 13 a awm thu leh raltlante chhawmdawl nan theihtawp an chhuah ṭhin thu an sawi a; ṭhenawm ram aṭangin raltlan ni lêm lo rawn lut an awm ṭhin thu sawiin, ram dang mi rawn lutte mumal zawka chhinchhiah a nih theih nan sorkarin check point siam se an duh thu Bawrhsap an hrilh a ni.

CYLA hruaitute chuan CYLA hmalakna hrang hrang Lawngtlai DC an hrilh a; kumpuan atan 'Ruihhlo do' an hman mek thu te, CYLA hmalakna avangin pawikhawihna a tlakhniam thu te, Myanmar leh Bangladesh nen ramri nei an nih avangin thâ thlah loa nasa zawka hmalak ṭul an tih thu te, zirna siamṭhat chungchang te, Lawngtlai District Hospital leh an district-a damdawi-in hrang hrangah thawktu an indaih loh thute an sawi bawk.

Bawrhsap Donny Lalruatsanga chuan, an district chhunga a bawhzui nghal theihte chu CYLA nen inráwn tlanga bawhzui a duh thu leh, thuneitu dang hnena thlen ngaite chu a lo thlen tur thu a sawi.