Saitual district: Sawhthingah support price cheng nuai 1,961 pe

District Agricultural Marketing Committee chu nimin khan Saitual district bawrhsap Dr Lalngura Tlau kaihhruaiin an ṭhukhawm. Kumina Saitual district-a sawhthing hralh leh leinaah kut hnathawktute hnenah support price cheng nuai 1,961 pek a nih thu leh, sorfkarin sawhthing a lei sa a hralh lehna aṭangin cheng nuai 415 hmuh a nih thu tarlan a ni.

Dr Lalngura Tlau chuan, Saitual district chu secondary collection centre (SCC) leh coordinator-te nena thawhhona a ṭhat avangin sorkar sum nuai 415 hum (save) a nih thu a sawi a, "Rim taka thawkte'n an thawhrim rah dik taka an têl hi lawmna tizualtu a ni. Sorkar sum hmang hêk lo zawngin kum thar atan felfai zawk leh ṭha zawka hmalak a nih theih nan theihtawp chhuah zel turin ka sawm a che u," a ti.

Ṭhutkhawmah hian SCC hrang hrangte kalphung standard operationg procedure (SOP) leh DAMC hmalak tawhna te, hmalak zel dan turte sawiho a ni.

Tarlan danin, Saitual district-a SCC pasarih leh FPC pahnih kaltlangin February 20 - July 31, 2025 chhung khan sawhthing kg 47,54,681 hralh a ni a; thu te, sorkarin Rs 4,15,89,307 man sawhthing a hralh a, kut hnathawktute hnenah support price Rs 19,61,44,743 pek a ni.