MCC-in College Week an hmang ṭan

Mizoram Christian College (MCC) chuan nimin khan Vaivakawn Cultural Centre-ah College Week an hmang ṭan a, South Asian Basketball Championship-a India aiawha gold medal la tawh leh Snooker National Champion-a champion Lalrina Renthlei khuallian a ni.

MCC hian College Week hi Mizoram State AIDS Control Society (MSACS) nen ṭang dunin an hmang a, thupui chu 'My Health, My Responsibility (Ka Hriselna, Ka Mawhphurhna) tih a ni. September 19, 2025 thleng Week an hmang dawn a, infiamna chi hrang hrang hmangin zirlaite an intihsiak ang.

Lalrina Renthlei chuan, Mizo ṭhalai, tum tak tak leh tei rei peih tan chuan infiamnaah sang tak thleng turin kawng a inhawn thu a sawi a; zirlaite chu Pathian bèl tlat tur te, an hriselna vawng uluk tur te, ruih theih thil laka fihlim tur leh, an thil tihna rêng rêngah taima leh rinawm taka hma lam pan zel turin a fuih.

MCC principal Dr Tawnenga chuan, zirlaite chu dik leh rinawm taka inelna thianghlim hmachhawn turin a chah a; Olympic-a gold medal tam tak la tawhtu Michael Phelps thusawi, 'Eng thilah mah in thlen chin tur bituk insiam suh u. In duhthusam a sàn poh leh chu chuan hmun hla zawk a thlen ang che u,' tih hre reng a, infiamna, zirna, nunkawng leh engkimah rinna leh huaisenna nena an duhthusam ûm zel turin a fuih bawk.