CM hoin Tualpuiah lo zawhpui buatsaih; 'Sorkarin kut hnathawktute a ngaisang' - CM

Nimin khan Tualpuiah 'Lo zawhpui' buatsaih a ni a, chief minister Lalduhoma bakah, minister leh MLA dangte'n an hmanpui. CM chuan, sorkarin kut hnathawktute a ngaihsan thu sawiin, thingtlang lo neih dan chu zawi zawia kalsan a nih theih nan sorkarin hma a lak mek thu a sawi.

Tualpui lo zawhpui hi Tourism leh Agriculture department bakah Association of Tour Operators Mizoram (ATOM) ten agro tourism chawikanna atana an buatsaih a ni a; minister pahnih - Lalthansanga leh Dr Vanlalthlana, bialtu MLA H Ginzalala, MLA Lalmuanpuia Punte, Tourism director Lalrodingi, Khawzawl bawrhsap Vanlalṭhiana leh sorkar hotu dangte an tel.

Chief Minister chuan, sorkarin kut hnathawktute a ngaisang a, a zah tih sawiin, "An kut hnathawh rahte sorkarin a lawmpui a, malsawmna dawng zel se a duhsak avangin sorkar department buatsaihin lo zawhpui hi hman a ni. Thingtlang lo neih hi bànsan thut theih a ni lo a, zawi zawia kalsan a nih theihna turin sorkarin hma a la mek zel," a ti.

Lo zawh chu khualzin hîpna atan ruahman mek a nih thu sawiin Lalduhoma chuan, "Tualpui khuain ramngaw a neih ṭhat vangin model village atan thlan hial a ni a, a thawktu tur company nen pawh inremna thuthlung peih thawkhat a ni tawh," a ti a; model village hnuaia hmalakna chuan khualzinte hîp thei turin hmasawnna tam tak a ken tel dawn thu leh nasa taka cheibâwl turin ruahmanna siam a nih thu a sawi.

CM Lalduhoma chuan, Tualpui mipuite chu khualzinte dawngsawng thei tura an hawihhâwm a ṭul dawn thu sawiin, an khua chu mi pan châk a nih theih nan leh hmânlai thil hlui humhalhna kawngah ṭan la turin a chah.

Chief Minister chuan, Tualpui leh Champhai inkar kawng chu NESIDS hnuaiah laih tur a nih thu a sawi bawk.

Champhai North bialtu MLA H Ginzalala pawhin thu sawiin, tourism nena kal kawp thei tura lo zawh hun hman a ni chu a lawm thu a sawi a, "Ram pawn mite pawhin an hre thar nasa a, hei hi loneitute tihchakna bakah, zin mite hîpna hmanraw pawimawh tak a ni," a ti.