Larsap leh officer tharte an inkâwm

Governor Gen. Dr Vijay Kumar Singh chuan nimin khan Raj Bhavan-ah Administrative Training Institute (ATI)-a foundation training nei mek Mizoram Civil Service, Mizoram Finance & Accounts Service leh Mizoram Information Service-a tling thar mi 34-te a kâwm a; danglamna leh hmasawnna thlentu nih tum turin a chah.

Gen. VK Singh chuan, MCS, MFAS leh MIS officer training mekte chu mipui rawngbawl hna thawk tur an ni tih hria a, inpekna leh ṭhahnemngaihna nena hna thawk turin a chah a, "Training hi nakin zel atana pawimawh leh inzirna hun a ni a, zir tur leh hriat duh in neihte inthlahrung loin zawt ṭhin ang che u. Danglamna thlen thei dinhmuna in din hunah hmasawnna leh danglamna thlentu nih tum u la, tun huna inzirte hi nakin huna nangmahni puitu tur leh inghahna tur a ni," a ti.

Officer tharte chu digitisation ngai pawimawh tura chahin Larsap chuan, "In thiamna leh theihnate tihpun zel tum a ṭul a, in hnathawh chhan mipuite dinhmun hriain, policy siamte an chhawr ṭangkai theih nan ṭan in lak a pawimawh," a ti a; hna thawh ṭhat vanga mite'n an hriat reng tur nih tum turin a fuih.

Inkawmnaah hian ATI director Rita Lalnunmawii Pachuau-in ATI chanchin leh training kalpui dan tlangpui a sawi a ni.