KHAWTHLIR

Vawk 12,497 thi tawh

Vawk pùl hri, African Swine Fever (ASF) kaihhnawihah kuminah nimin thleng khan khaw 157-a chhungkaw 3,643 vawk vulh 12,497 a thi tawh. Vawk thi zinga 9,065 chu hri vanga thi niin, a dang 3,432 chu hri darh tur venna atana suat a ni. Kumin bikah Aizawl, Lunglei, Siaha, Champhai, Lawngtlai, Mamit, Saitual, Khawzawl leh Hnahthial district-ahte ASF a lêng tawh a ni.

Swachhata Hi Seva

India ram puma faina beihpui thlakna, Swachhata Hi Seva chu vawiin hian kalpui ṭan a ni dawn a, October 2, 2025 thleng a awh ang. Swachhata Hi Seva chhung hian bawlhhlawh thenfai tur hmun bik (cleanliness target unit) thlang chhuakin, hnatlanga tihfai ṭhin a ni dawn a; September 25, 2025 khian India ram pumah a rualin faina hnatlangpui buatsaih a ni ang. October 2, 2025-ah Faina Ní (Swachhata Diwas) hman a ni dawn a ni.

Sangha thar pun dan tur zirho

Fisheries department chuan nimin khan IWR Auditorium-ah Kisan Credit Card chungchang leh department-in sangha thar chhuah tihpun dan turte leh hmachhawp zirhona an buatsaih. Ministry of Fisheries, Animal Husbandry & Dairying joint secretary Sagar Mehra bakah, Fisheries officer te, bank-a hotute leh sangha khawitute an tel a ni.

Faina beihpui thlak dan tur sawiho

Lungei District Steering Committee on Swachhata Hi Seva chu additional DC Zoramdini hoin nimin khan an ṭhukhawm a; DC office bakah, Lunglei Municipal Council, PHE, UDPA leh Rural Development department aiawhte an tel. 'Swachhata Hi Seva' kalpui chhunga Lunglei district-a faina beihpui thlak dan turte sawiho a ni.

Tihdikna

September 14&15, 2025, chhuak Vanglaini phek 2-naah, Mizorama upa bera puan Lalneihsangi (Buangi) pian kum ziahah tihsual a awm a; Lalneihsangi hi April 14, 1917-a piang a ni a, tunah hian kum 108 a ni.