Mizoramin agriculture lama a mamawh ber chu feh kawng ṭha - Agri. Minister

Ministry of Agriculture & Farmers' Welfare chuan September 15-16, 2025 khan New Delhi-ah National Conference on Agriculture: Rabi Campaign 2025 an buatsaih a; Agriculture & Farmers' Welfare minister PC Vanlalruata telin, Mizoram agriculture sector-in a mamawh ber chu feh kawng (farm road) ṭha a nih thu a sawi.

PC Vanlalruata chuan, Mizoramin loneitute tana a mamawh te, sorkar hmalakna leh hmachhawpte inkhawmpuiah hian a sawi a, "Mizoram chu tlang ram kan nih avangin inkalpawh zung zung a har a, Mizoram agriculture sector-in kan mamawh ber chu feh kawng ṭha a ni. Fûr ruah tui a tam châng phei chuan lei a min nasa ṭhin a, loneitute tan harsatna tam tak a thlen ṭhin. Farm road ṭha zawk kan neih theih nan sorkar laipui puihna Mizoramin a mamawh a ni," a ti.

Mizoram chu tlang ram a nih avangin central scheme tam tak chu a nihna ang taka kalpui a harsat ṭhin thu sawiin Minister chuan, "Kan leilung leh sik leh sa mila Mizoram tan bik scheme duan a ṭul a, chutiang tur chuan central sorkar puihna kan mamawh," a ti a; rabi season lo awm turah pawh ICAR-IIPR leh NEH te nen thawkhoin, hmalak zel tum a nih thu a sawi.

National Conference on Agriculture: Rabi Campaign 2025-ah hian state hrang hranga Agriculture minister-te an tel a, nakkum rabi season atana hmalak dan turte sawiho a ni. Mizoram aṭangin Agriculture & Farmers' Welfare secretary Ramdinliani, director R Lalnunzira leh joint director Lalhmingmuana Renthlei ten Minister hi an ṭawiawm a ni.

AGRICULTURE MINISTER SAWI DANGTE
* Mizoramah leilet (wet rice cultivation) hi ram hectare 8,175-a zauah kalpui mek a ni a, WRC atana la hman theih tur hectare 1,39,372 a la awm.
* National Mission on Edible Oils - Oil Palm scheme hnuaiah hmalak mek a ni a, oil palm hi Mizoramah a ṭha duh.
* Farm road kan neih ṭhat tâwk loh avangin oil palm chingtute'n harsatna an tâwk mek.
* National Mission on Edible Oils - Oilseeds hnuaiah rapeseed leh niger-ahte hmalak mek a ni a, rapeseed hi a chi (seedling) quintal 3.76 leh niger hi a chi quintal 10 sem a ni tawh.
* Tungah sorkarin ṭan a la leh mek a, tung tihhmasawnna atan Action Plan cheng nuai 399.37 sanction a ni tawh.
* Chak zawka hmalak a nih theih nan NMEO-Oilseeds scheme hnuaiah tung telh ve theih ni se.
* Saitual, Khawzawl leh Serchhip district-a chhungkaw 331-in tung an ching mek.
* National Food Security & Nutrition Mission hnuaiah field pea leh rajmah bikah cluster demonstration kalpui mek a ni.
* Rice-pulse cropping kalpui a ni a, thlai chi quintal 24.90 sem a ni tawh.
* Cocoa hi Mizoram leilung nen a inmil em em a, kut hnathawktute sum lak luh a pun theih nan oil palm leh tung nen cocoa inter-cropping tura hmalak tum a ni.
* Cocoa seedling quality ṭha a ngai dawn a, Mizoramah ngei ICAR nen ṭang kawpin nursery hi bun theih ni se.