Ruihhlo leh ILP chungchang zirho

Kolasib bawrhsap Robert C Lalhmangaiha hoin nimin khan Kolasib Diakkawn YMA Hall-ah awmze nei zawka ruihhlo do leh fimkhur leh khauh zawka ILP kalpui dan tur zirhona, 'Legal awareness seminar on ILP and reduction of illicit trafficking of contraband drugs' buatsaih a ni a; Kolasib district-a Police leh Excise hotute bakah, khaw hrang hranga khawtlang hruaitute an tel.

Bawrhsap chuan, Kolasib district chu ramri depa awm a nih avangin kawng hrang hrangah a pawimawh thu sawiin, "Ruihhloin kil tin aṭangin kan ram a hrût a, Assam aṭangin a rawn lehluh bawk. Hei hi kan ram min tichhetu a ni tih kan hriat tlân avangin sorkar, a bik takin police leh END te, YMA te, khawtlang leh kohhranten mahni zawn ṭheuhah theihtawpin dan chah tumin hma kan la a ni," a ti.

Kolasib SP David H Lalthangliana tarlan danin, kumin January 1 aṭanga nimin thleng khan Kolasib district-ah heroin gram 89.75 leh methamphetamine kg. 23 man a ni tawh a; ruih theih thil dang an mante nen belhkhawmin cheng vbc 3.02 hû a ni.

Sapzu litre 9,208 leh beer litre 2,000 chuang an man tawh a, cheng nuai 56.4 hû a ni. Kuhva rah ip (bag) 14,254 man tawhin, thubuai pariat ziah luh a ni tawh. Kumin chhungin ILP dik lo chungchangah mi 166 manin, dan angin an chungah hmalak a ni a, mi 150 an thawn kir (push back) tawh a ni bawk.

Zirhonaah hian mithiamte'n thupui hrang hrang an zirtir a; awmze nei zawka ruihhlo do dan tur leh khauh zawka ILP kalpui dan tur an sawiho a ni.