Oct. 2025 ral hmain scho' sem beisei

Mizo Students Union (MSU) chuan thuchhuah siamin, October 2025 ral hma ngeiin zirlaite hnenah scholarship sem chhuah beisei a nih thu an tarlang.

MSU chuan, tribal scholarship sum chu Ministry of Tribal Affairs-in July 7, 2025-ah sanction tawh mah se, Mizoram sorkar Finance department-in SNA SPARSH an lo hman tawh avangin pawisa dawn theih loh reng a nih thu an tarlang a, "Mizoram Finance Commissioner-in old system (kalphugn hlui) anga Central Finance-ah September 2, 2025-a DO letter hmanga exemption an zuk dil hnuah, September 15 khan Central sorkarin exemption a rawn pe a ni," an ti.

Scholarship bika sorkar laipuiin ngaihhnathiamna a rawn pek chu October 31, 2025 thleng atan a nih thu sawiin MSU chuan, "Sorkar hotute hnen aṭanga kan thu hriat danah, sum dawnna tur ber a fel tawh chuan October 2025 ral hma ngeia scholarship sem chhuah hman an beisei thu an sawi," an ti a; scholarship-a Mizoram sorkarin a tum ve tur (state matching share) cheng nuai 560 chu August 19, 2025 khan pek chhuah a nih tawh thu an tarlang bawk.