2014-15-a sorkar hnathawk MR bill vbc. 81.7 MR bill tam lutuk tihtawp vat a ngai: Hawla

Sorkar kum kal ta, 2014-15 chhunga Mizorama sorkar hnathawkte medical reimbursement (MR) bill chu cheng vbc. 81.7 a ni. Chief minister Lal Thanhawla chuan, MR bill tam lutuk ṭhin chu tihtawp vat a ngaih thu a sawi.

MR bill chungchanga MNF member Dr K Beichhua zawhna kal zelah chief minister Lal Thanhawla chuan, sorkar hnathawkte MR bill a tam lutuk tih chu tlang hriat a nih thu a sawi a, "Phai lama inenkawl apiangin an nawm an mâkin an hmang a ni. Hengte hi kan break (titawp) dawn nge, sorkar hnathawkte hi MR bill-ah kan classified (thliar) dawn tih rilruah a awm. Bill sang ṭhin lutuk hi tihtawp vat a ngai, kan state ang chuan kan tlin lo," a ti.

Chief Minister sawi danin, state ṭhen­khat chuan MR bill hi miin an dil ang ang pe tawp loin, an enfiah nawn vek ṭhin. Mizoramah chuan bill an thehluh ang ang an pe tawp tawp ṭhin. State ṭhenkhatah chuan sorkar hnathawkte'n an MR bill atan thawh (contribution) an nei ve ṭhin a, chutianga tih ve dan tur chu Mizoram sorkarin a ngaihtuah a ni.

Finance minister Lalsawta chuan, sorkar hnathawkte MR zir chiang turin committee din a nih thu House a hrilh a, "Committee-te hi thla ruk chhunga MR bill kalphung thar tur leh senso a tlem theihna atan rawtna siam tura tih an ni," a ti. He thilah hian Lal Thanhawla chuan, thla ruk chu a rei avangin, thla thum chhungin committee-te chu rawtna thehlut tura ti turin sorkarah rawtna a thehluh thu a sawi.

INC member leh Health minister hlui Lalrinliana Sailo chuan, Health department a enkawl laiin, sorkarin damlo phaia a thawnna atan kum khatah cheng vbc. 170 vel sên ṭhin a nih thu a sawi a, "Hetianga phaia in refer a ngaih chhan chu hmanrua kan neih ṭhat loh vang a ni. In refer-na atana sum sen vak vak ngai lo tur hian hmanraw ṭha lei ila, kan doctor-te hi an ṭha tawk. Hmanraw ṭha kan neih phawt chuan refer-na atana kan senso hi a tlem phah ngei ang tih ka chiang," a ti.

MR zir chiang tura sorkarin committee a din-a chairman chu chief secretary a ni a, member secretary chu Finance commissioner a ni.

Member-te chu - Law & Judicial secretary, Planning secretary, Health principal director, chief controller of accounts, MHCS OSD, FMGE&W president, Lalhmingthanga IAS (Rtd) leh Finance secretar hlui Lalthansanga te an ni.