Nupa ram riak thiin chhar

Nimin zing dar 9 vel khan Lalrinchhana (45) leh a nupui Lalzuimawii (40), Chhanchhuahna Khaw­puia mite chu an ram riah­naah thia chhar an ni.

Chhanchhuahna Khaw­pui branch YMA secre­tary Lalchhanhima hnen aṭanga thu dawn danin, nimin zing dar 9 vel khan Lalrinchhana leh Lalzuimawii te ruang hi North Serzawl leh Chhanchhuahna Khawpui inkara Tuitung lui depa an ramriahnaah hmuh a ni.

Ruang hmu hmasatute chuan Lalzuimawii chu thlám chhung kawngka bulah an hmu a, Lalrin­chhana chu thlám nam­thlâkah an hmu thung.

Lalzuimawii nghawng hmun thumah leh a dàr ding lamah hliam a awm. Lalrinchhana pawhin a nghawng hmun hnihah hliam a nei. An ruang hi enfiah turin Darlawn damdawi-inah lak a ni.

Lalchhanhima chuan, Lalrinchhana leh Lal­zui­mawii te chu mi kut tuar ni ngeia an rin thu sawiin, thawmhnaw an hâk mumal loh avangin an hnathawk inbual zo hlim a nih an rin thu a sawi a; thlámah silai mu ruak hmuh a nih thu a sawi bawk.