Lirthei chhiah tihpun a ni dawn

Nimin khan Mizoram Assembly session ni hnihna chhunzawm a ni a, dan ding lai siam ṭhatna tur, ‘The Mizoram Motor Vehicle Taxation (Amendment) Bill, 2015’ pass a ni. He dan thar hi lirthei aṭanga chhiah lak tihpunna tur a ni.

Bill hi Transport minister John Rotluang­liana’n House-ah a pu lut a; minister chuan, tuna dan hman lai, The Mizoram Motor Vehicle Taxation (Amendment) Act, 2011-ah chuan road tax chu motor hman theih chhung zawng atan a man pumpui aṭanga chhûta 4.5% lak a ni a, chu chu mimal leh pawl ṭhenkhatin an sawisel avangin ṭhenawm state-te chhiah lak dan zir telin, dan siam ṭhatna tur duan a nih thu a sawi.

John Rotluangliana chuan, Union Road Transport & Highway Minister kaihhruai, Transport Development Council-in October 23, 2013-a a an rêl angin, India ram pumah lirthei aṭanga chhiah lâk dan inang tlanga siam a rêl a, motor leina man aṭanga 6% chhiah lak ni se, tih a nih thu a sawi a; “Tuna Mizorama dan hman lai hi siam ṭhat a ngai ta a ni,” a ti.

Transport Minister sawi danin, The Mizoram Motor Vehicle Taxation (Amendment) Bill, 2015 hi hman a nih hunah chuan lirthei man aṭanga 6% road tax pek tur a ni a, chu chuan lirthei hman theih chhung (life time) a huam ang.

Assembly session hi vawiinah chhunzawma zawh a ni ang.