Kum 3 chhungin dan anga fa lâk 241

Social Welfare de­part­ment, Mizoram State Child Protection Society leh T Romana College-te chuan, nimin khan Aizawla IPR Auditorium-ah ‘Child rights and child protection: Issues and challenges’ tih thupui hmangin seminar an buat­saih.

Kum thum chhungin dan anga fa atana naupang lâk (adopt) 241 an awm thu sawi lan a ni.

Seminar-a khuallian, Social Welfare minister PC Lalthanliana chuan, naupangte dikna chan­vo humhalh tur leh chan­haite’n enkawlna ṭha an dawn theih nan sorkarin ṭan a la mek tih a sawi a, “Kum 2000-ah dan thar, Juvenile Justice (Care and Protection of Children) Act siam a ni a, Mizoram pawhin Juvenile Justice (Care and Protection of Children) Rules, 2010 a nei tawh a ni,” a ti.

Social Welfare Minis­ter chuan, Social Welfare department hnuaiah Integrated Child Protection din niin, thawktu mi 300 vel lak a nih tawh thu a sawi a, chu’ng mite chuan state sorkar hnuaia naupang chanhai enkawlna home 44 an vil reng tih a sawi.

Minister sawi danin, Mizorama home 44-ah naupang 1,200 an awm a, dan ang thlapa fa lâk (adoption) kalpui a ni a, kum 2012-13, kum 2013-14 leh kum 2014-15 chhungin naupang 220 chu ram chhunga miin an lâ (adopt) a, 21 chu ram páwnah lak an ni.

Seminar-ah hian mi 16-in paper an buatsaih an chhiar a, sawiho nghal a ni. Vawiinah chhunzawm a ni ang.