Health Minister-in mahni intihhlum Veng tura tan lâk nasat tul a ti

Health minister Lal Thanzara chuan, tunlaia Mizo ṭhalai zingah mahni intihlum an awm fo chu hriat hrehawm a tih thu a sawi a, mahni intihlum zel tur an awm loh nan ṭan lak an tum thu a sawi.

Vanglaini palaiin a kawmnaah Lal Thanzara chuan, "Mahni intihlum an awm thu hian min nghawng na hle a, a beidawn­thlak a, hriat hrehawm ka ti tak zet a, ṭan lak a ngai a ni," a ti.

Rilru lama harsatna neite enkawlna, mental hospital lian zawk sakna tur sum an dawn thuai a beisei thu leh, mithiamte nen ṭangkawpa theihtawp chhuaha ṭan lak an tum thu a sawi.

Health Minister chuan, an party election manifesto no. 11-naah, 'Mizoramah Mental Hospital kan din ang,' tia an dah thu te, an manifesto bawhzuina atan tunah hian Non Lapseable Central Pool of Resources-ah mental hospital sakna an dil ang­in chengn vbc. 50 an pawm tawh a, DPR pawh thehluh tawh niin, sum an rawn pek thuai a beisei thute a sawi a ni.

Mahni intihhlum venna tura ṭan lak an tum dan sawiin, Lal Thanzara chuan, "Rilru lama harsatna neite tan biak pawh zung zungna tur telephone awm se, mipui hriat turin tár chhuak ila. Dr C Lalhrekima'n a phone number a tár chhuak hi a lawmawm hle. Tlawmngai pawl te, kan mithiamte nen pawh ṭang tlangin hmalak a ngai tak zet a, kan ngaihtuahna tak tak sênga ṭan kan lâk a ngai a ni," a ti.