Sum hman dan pe turin ngen

MNF member Lalruatkima chuan, RKVY aṭanga Kolasib District Veterinary Officer hnena pawisa pek tawh, AH&Vety directorate lama pawh lêtsak ṭhen danah dan loa thil tih a awm tih a sawi a, an hman dan pe turin AH&Vety minister C Ngunlianchunga a ngen.

Lalruatkima thu sawi chungchangah minister C Ngunlianchunga chuan, Rashtriya Krishi Vikas Yojana pawisa chu dik taka hman a nih thu a sawi a; Lalruatkima'n a duh phawt chuan pawisa hman a nih dan leh pawisa dawngtute list an pek theih tur thu House a hrilh.

AH&Vety Minister sawi danin, Kolasib DVO hnenah hian bawng leina atan cheng nuai 150 pek a ni. DVO chuan bawng 124 leina atan cheng nuai 55.80 a hmang a, mi 62-in bawng-in an sakna leh bawng phurhna senso atan cheng nuai 21.70 a hmang bawk.

Pawisa hman bâng cheng nuai 72.45 chu NLUP hnuaia bawng pek tawh, a hnua thite rulh lehna atana bawng leina turin AH&Vety directorate-in a pawt kîr a ni.