Champhaia leimin thenfai hna thawk
Champhai Kanan Veng leh Vengthlang inrîna báwr vela kum hmasa lam aṭanga leiminte chu Disaster Management & Rehabilitation department sum pek nuai 40 hmangin thenfai a ni a, zawh thawkhat a ni tawh.
Champhai Kanan Veng kawngpui chungah August 2013 khan lei a min a, hmun zau tak a khi bawk a; chuvang chuan August 28, 2013-ah in ding lai 23-a chhungkaw 29-te chu sahimna zawngin an in an rauhsan a, chhungkaw pasarihin in leh lo an chán zui a ni.
Champhai District Disaster Response Team-a chairman H Lalengmawia, Champhai DC chuan, lei tawlh vanga chhiatna thleng thei laka mipui leh lirthei tlân velte an him theihna tur an ngai pawimawh ber tih a sawi a; tuna sum neih sa hmangin hmalakna lian tham tih theih a nih rih loh thu leh, lei paihna khawl bakah, mihring thâ hmanga thawh zui a ṭul tur thu a sawi.
Champhai DC sawi danin, lei tawlhin kum hnih chhung Kanan Veng leh Champhai Vengthlang inkal pawhna kawng pakhat a hnawh pin chu tihtlang a ni dawn a, lirthei tê chi leh lirthei laihawl zawh theih tura cheibâwl a ni ang.