Zangnadawmna dawng tawhte chhuak turin ti

National Highway-154 in a paltlang tur Bairabi khuaa chhungkaw 79-te chu, zangnadawmna an dawn tawh avangin an chenna in chhuahsan tura hriattirna, nimin khan Kolasib DC Jitender Yadav-a'n a hlan.

Kolasib DC hian chhungkaw 79-te chu Bairabi community hall-ah ko khawmin, kum 2007-a zangnadawmna an dawn tawh avangin an in chu an ta a nih tawh loh thu a hrilh a, "Mipuite'n kawng ṭha kan duhna avang leh YMA khawmpui lian October thla chhungin Bairabi-ah a awm dawn a, hei vang hian kawng siamṭhat hna thawh a ngai a ni," a ti a; sorkar hmalakna zah thiam tur leh thawhhopui turin a sáwm.

Zangnadawmna dawng tawh, an in la chhuah­san lote chu chawlh­kar thum chhunga an in ṭhiat tura tih a ni a; an in chhuahsan tura tihte chuan zangnadawmna an la dawn kim loh thu DC hrilhin, "A hun laia survey rawn titute'n pawisa dawng phawt a, a bak chu nakinah kan dawn tur thu min hrilh a ni," an ti.

PWD executive engineer Sanghrima Chawngthu sawi danin, in a la din reng avangin contractor-te'n hna an thawk thei lo a, khawl chhawp tawhte chu hna thawk loa an awm reng man Mizoram sorkarah an ṭhíng a ni.

Bairabi khaw chhung­ah hian zangnadawmna dawng chhungkaw 101 an awm a, an zinga chhungkaw 22-te chuan an in an ṭhiat tawh. Chhungkaw 14-te erawh chuan lungawi lohna an neih avangin Court-ah an zualko mek thung.